Agenda

Ar gevredigezh Raok a ginnig vakansoù dre soubidigezh e brezhoneg war varc’h-houarn e Kreiz-Breizh. Eus ar 1añ betek ar 5 a viz Eost 2022 e vo.

Petra eo roll ar staj-mañ ?

Loc’hañ a raio eus Karaez da vont da v/Melioneg ha da c’houde d’ar Faoued, d’Ar Sent, da Landelo ha da vBrasparzh e pemp devezh. Etre 30 ha 40 kilometr e vo graet bemdez war varc’h-houarn. Gwelloc’h eo bezañ kustum da vont war velo un tammig memestra pe mod-all implijout ur velo tredan.

Prantadoù stummañ a vo kinniget gant stummerien Roudour. Kejet e vo ouzh brezhonegerien eus ar vro gant ar strollad hag evel-just e vo gwelet lec’hioù kaer Kreiz-Breizh.

Evit piv eo ar staj-mañ ?

Evit ar vrezhonegerien a fell dezho kaozeal e brezhoneg penn-da-benn e-pad ur sizhun ha pinvidikaat o live yezh eo.
Evit an holl dud a fell dezho ober anaoudegezh gant Kreiz-Breizh dre ar brezhoneg.
Dav e vo bezañ gouest da gompren ha kaozeal e brezhoneg. Degemeret e vez an dud o tapet al live A2 da nebeutañ. (Gouzout hiroc’h : Qu’est-ce que le niveau A1, A2 ou B1…? En savoir plus sur le CECRL)

Penaos e vo aozet ar staj ?

Lec’hioù kousket : An nozvezh kentañ e vo kousket en un dachenn-gampiñ (degas e deltenn. A-hend-all e vo kinniget un diskoulm ma n’ho peus ket unan). Evit an nozvezhioù all e vo kousket e-barzh un ti bep tro.
Boued : Tremenet e vo dre lec’hioù evel stalioù-bara pe ispisirioù ha gourmarc’hadoù evit ober prenadennoù. D’ar stajidi da vezañ emren evit merenn. Fardet e vo boued asambles diouzh an noz, hag an dijuniñ a vo meret ganeomp ivez.
Ur c’harr-samm a heulio ar strollad bemdez ha degas a raio ar seier hag ar boued.
Ma n’ho peus ket ur marc’h-houarn e c’hellit feurmiñ unan e tachenn-gampiñ Karaez.